Terapie – ouderdomsbeperking- weens my gekruide woorde..

Om te blog is vir my terapie.

Dit weerhou my soms van wrede kommunikasie met siele wat binne tref- of hoorafstand-  van my woordvloei ,  tranedal  – staan/sit /beweeg of  wat ookal..

Nou sit ander mense soms opgeskeep met my Woorde.

Ons , dit is nou die twee in die huis op die hoek, ons gebruik deesdae pille. Plakkers en pille vir goete en geite, chroniese soort.

Skildkliere wil nie meer aktief wees nie..hormone is lankal moertoe tesame met  my histerektomie.  Een mooi sonnige dag is daar toe nog ‘n skrif aan die muur – daardie telling van Cholesterol. Myne is erfsonde syne – miskien bietjie te lekker eet , alhoewel ek dink ek eet ook nou nie oordadig baie nie net verkeerd.. brosgebraaide ..ag toemaar !

Die mediese fonds (  verstaan my goed -ek is kennelik  dankbaar dat ons een het en nog die premies kan betaal)  vereis dat chroniese medikasie sesmaandeliks hernu moet word. Dit beteken ek moet die martelaarskamer betree en daar sal bloed getrek word om te bepaal of pille sterker of moontlik nog dieselfde gram moet bly. Dalk ook nog ‘n woordelikse waarskuwing van my GP  oor die telling neuk na 9 …

Ek ken my are. Daar vloei regtig bloed deur die goed maar is diepgeleë . Ek waarsku die vrou in wit vooraf  ‘asseblief ek weet daar word altyd gesukkel om my bloed te trek!’  eintlik wil ek net vooraf vra wees my genadig assseblief  -moenie my weer seermaak nie al is ek 60+ – ek kry seer …

Dan sit ek daar met my  ou groot bruin oë ongesluierd en my wrewel duidelik sigbaar vir almal teenwoordig.

Ek sluk . Die Man in my lewe kom met empatie in sy oë  om die hoek . “Sjame, ek kry jou sommer jammer” dan sluk ek nog ‘n keer..

Nee seg die vrou in wit  “..ek ken my joppie..ek is hier vir bloedtrek , ekkk maak niemand seer nie! ”

Ek sit haar met leed in my oë en aankyk, sou my kop wou skommel soos Kinta , nietemin ek maak gebruik van die wag voor my mond.

En sy klamp daardie band om my arm trek hom so styf , seker gedink daar sal ‘n vulkaan van bloed uit die ou vrou se are spuit.  Sy voel so met haar voorvinger, verklaar triomfantlik ” ..ek voel hom !! ek voel hom !”  my magtag nê, sit ek en dink.  Sy voel en sy druk daai naald daar waar die aar so dik lê ..toe gebeur daar f @#$%.ol (amper lus gehad om vir die bleddie nurse te sê ‘ maar ek het jou mos gesêê!”

Nurse nr 2 met ander balkies op die skouer ..word bygeroep , en nr1 regverdig nog haar poging en akuraatheid so asof die aar weggeloop  het …Hul bespiegel die diepliggende probleem. Ek bevestig net wat elke keer gebeur, en dink ag asseblief net nie op my hand nie of my voete nie . Sal die nurse nie al harder praat ten aanhore van die hele gang oor die vrou met die are nie!!!  ek voel hoe klop-klop die bloeddruk in my are en my hand gaan dood ..

Nommer twee met die ekstra balkie , gee my net een kyk  en ‘ ander arm ‘ opdrag sy. Rol ek maar die bloes se moutjie op soos lam ter slagting en sy trek die band nog stywer en sy opdrag “Pomp Pomp!” en ek doen mee.. hand oop en toe.. Ek verkleur erger as wintertyd met wintershande . Sy voel voorvingersgewys druk ‘n naald in. draai dit dwars – wikkel , wikkel en niks  maar niks spuit in die buisie in nie. Die uwe pyn en daar kom so gevoel van woordeskat wat opborrel uit my wese ..newwermaaind bloed  en toe …

“Suster?” roep sy. Sy bekla haar lot by nr 3 . Nommer 3 neem  ander naald  en ander buisie,  trek die band stywer – bring ‘n kussing , ek dag dit is vir my hoof -gmf!  Raas met ferm stem sit agtertoe . Du my tot teen rugkant van stoel -ek sit , arm op die kussing hang so afdraande oor die kussing ” Nee , kan nie hierdie aar gebruik, kliphard, bloeding onder die aar!”  ek sit en vloek in my enigheid f @##$%$  – hier maak hul my nog dood voortydig.

Daar slaan koue sweet op my bolip uit toe sy my hand omdraai en my pols so bekyk en klop aan ‘n aar soos aan ‘n deur. Daardie polsaar sal waaragtig nooit meer dieselfde wees nie,  sy druk naald in , sy klop morsekode op die stomme aar!  Die ander 2 staan en toesig hou, almal juig van vreugde met elke klop pirts daar bietjie bloed.. klop -pirts-klop-pirts – en die een vra “hoeveel moet ons gee”  en die ander een vertel ” 2 toetse Suster” en sy noem die goed se name ..en sy vra”dink julle hierdie is genoeg virrie lab?’ en ek dink ..

nee ek sal liewer nie herhaal nie..

Wel , ek het dit amper verloor(soos Kinta graag sê as haar geduld nou moerlandspan toe is)  toe die drietal met hangkoppe fluister ‘ jammer vrou  dat ons jou nou moes seermaak ”

VROU !! ek is nie jou bleddie vrou nie man ek is Mev so en so wat jul gemartel het omdat jul eerstens nie my woord wou aanvaar nie en gedink het ek is bang vir die bleddie naald en bloedtrek!!!!

As iemand weet waar ek in Vereeniging oor 6 maande van my bloed in ‘n buisie kan laat pomp.. asseblief laat weet my.  Dringend .