Die Ou vrou in die Hoekhuis

Die stomme vrou van die Hoekhuis.. die een met die welbekende, alombeminde trosie , haar oorgrootkamerjas. (Jammer Perdebytjie geen foto nie)

Sy bad mos nie meer nie.

Sy stort. Daardie luukse stortjel so oor haar ouderdomlyf gespons ..en dit is mos waar sy staan en dink.

1. Moet lading in wasmasjien gooi.

2. Moet tuin watergee.

3.Moet pille drink.. haar rug sien!

4. Moet blog baar.(oe sy hou van hierdie woord.. die naaste wat sy ooit aan barensnood kan /kon verkeer.) Genadiglik op papier.

5.Moet ..

Teen haar halfvoltooide lys is sy klaar gestort. Handdoek byderhand  droog sy haar af.

Met die probleem van haar ou rug( operasie).. is daardie senuwee wat gevoel oordra na die een voet bietjie in sy moer in  en toe voel sy nie ..gelukkig kyk sy afwaarts.

Toe loop die spinnekop so oor haar naakte voet.

Sy staan toe en wonder sal sy gil… en toe dink sy aan haar Evasgewaad .  Onthou tog, liewe leser,  sy is nou nie gebou sodat Iemand met oop arms gaan binnestorm om haar te red nie!! Sy moet darem regstelling maak – hy sou definitief ingestorm het sodra  hy die oorsaak aangehoor het sou hy blerriedefinitief uitgestorm het. Nee nie oor haar naaktheid nie(gmf!) – die man se fobie vir die agtvoetige spesie..

Sy stap toe maar sedig kombuis toe (geklee) en vertel toe so rustig moontlik aan haar ou Man van die besoeker.

Wou jul maar net inlig ek het gesien hy’t gaan stort. Die spuitkannetjie in sy hand ..en dit was nie Mum for Men nie..ek belowe jou !