Tweegesprek

Die twee ou mense sit onder hul dierbare boom. Die koel luggie streel deur hulle gryshare.

Hulle gesels nie.

Hulle kla.

Sommer so in die niet, of miskien nie.

Sy: “Vader tog maar my heup is seer!”

Hy: “Ek sal op die donnerse dak moet klim!”

Sy:” Ek wonder of dit my rug is”

Hy: ” Kyk, daar groei al bome uit die geute, sal moet skoonmaak.”

Sy: “Ek wonder of dit my oorgewig is.”

Hy:” Ek dink mens moet hierdie swaar dakteëls afgooi, sommer sinkplaat opsit”

Sy:” Miskien is dit my gewig”

Hy:” Dit is hoekom die huis se mure bars”

Sy:” Oor my gewig?”

Hy: ” Nee Vrou ek dink nie jou heuppyn het hoegenaamd iets met jou gewig uit te waaie nie.” Verder verduidelik hy toe ook nie..

Sy:” Miskien is ek soos die huis , my anatomie raak te swaar vir my skelet..”

Hy: “Miskien..”