Liewe Mia

Ouma het vir Mamma gevra vir fotos om die geskiedkundige oomblik as Bewysstukke te verewig.. Die eerste kruip.

Stap 1

Jy maak gereed, vir die groot oomblik… Jou Ma lê met kamera gereed.So my liewe Mia,begin jou eerste menslike beweging van punt A na punt B,  geboekstaaf – miskien eerder geblogstaaf, vir eendag se kyk  en weerkyk.

Stap 2

Hier gebeur heelwat dinge..die veterhondjies gee pad met spoed.. want skielik kom die klein mensie met die stem na hulle aangekruip.

Stap 3

Kyk , die een knie half gelig die ander been half ingevou. Ouma het onthou jou Mamma het met stywe beentjies gekruip..boude in die lig, sy wou nooit haar knieë op die grond laat kom  nie. Moet darem noem, jou Mamma het met spoed die lewe bestorm in daardie vreemde kruip posisie!

Stap4

Hier is jy  oppad..jy storm glo bitter graag die Veterhondjies se bakke.. Neee, jy het nog nie die hondepille geproe nie, maar definitief het jy jou Ma se spoed beproef.  Sy moes kosbakke woerts van die vloer opraap.

Stap 5

Verbete , vasberade. Nou gaan die Beskermengel amptelik haar vlerke wydoopgesprei hou oor jou.

Jou Ouma sit met haar hart en siel in haar angsgeswete handpalm vasgeklem –

die ander hand oor Ouma se mond .. aan’t hyg.

Ek het ‘n vermoede voordat jy een jaar oud is, gaan jy jou eerste treë gee.

Na ‘n week se gekruip, het jy skielik (net soos Mamma destyds) met reguit bene – boude in die lug, en reguit arms begin  in ‘n  kruipposisie staan.

Dit steun en dit kreun en dit kwyl en dit ghoe en dit gha, en toe ..

Probeer jy regop kom… ag hemel my kind!

Die tweede poging was suksesvol..voordat ons nou eintlik kon juig van verstomming het jy vooroor getuimel.. toe gil ons in ‘n koor tesame…

Ouma en Oupa hol nou ook deesdae die Marathon. Voel soos duisende kilometers.. al agter jou aan ..

Ouma aanvaar jy geniet elke oomblik, jy bekyk die wêreld vanuit  ander posisies.

Ouma aanvaar ook,  jy besef nie as jy jou oggend slapie kry .. hoe verlig is Ouma, en jou Beskermengel nie, dié slaak ook hoorbaar ‘n sug van verligting..tot die volgende ontdekkingsreis ganglangs..

Ouma wou nog vertel , dat jy verskriklik begin gesels..daarvan vertel ek later.

Ons is baie lief vir jou Mia

Ouma en Oupa.

Advertisements