Almanak of Kalender ?

In ons huis het my Ma altyd van ‘n Almanak gepraat .

Albei van Almanak tot Kalender word in HAT gebruik – vinkel en koljander.

Ek het eendag tydens ons vakansie vir my  ‘n Kalender gekoop , gedruk op herwinbare papier – bruinpapier waarmee ons lank terug boeke oorgetrek het.

Elke maand het ‘n  fyn penskets neffens die maand. Buitelyne van  naakte vrouefiguur.  Elke dag het ook ‘n wysheid of inligtingstukkie by. Sommige vreeslike stroperig, sommige dae  interessante  inligting soos dat Amandels deel van die perske familie is. Feit? ek weet werklik nie.   Op die koop toe sien mens darem ook wanneer  dit volmaan is.

As hul jou nou so ewe vra by die 16 de “Wat het jy gister gedoen wat noemenswaardig is?” dan besef ek miskien moet ek meer bewus wees van my doene en late. Die  minusse en plusse , dit laat mens dink . ‘n Dag verby en ek kan wraggies nie eens rekenskap gee van iets noemenswaardig nie! Gister ? Ek het vir Mia opgepas en haar probeer vermaak – dit wil gedoen wees , dit vertel ek jou. Vermaak bietjie ‘n baba van 4 mnde ! Breinoefening se Moses.

Vandag en Môre  het iemand hierdie wysheid kwytgeraak en is dit belangrik genoeg ge-ag om gedateer te word . Moontlik vind jy dit leersaam of  laat dit  jou minstens daaroor bespiegel-

“Ek het geleer dat, bloot omdat twee mense stry dit nie beteken dat hulle mekaar nie liefhet nie

en

net omdat hulle nie stry nie,

beteken nié  dat hulle mekaar nie lief  het nie!”

Hmm, laat jou dink en my  tot die slotsom laat kom – stry maar dit is aanvaarbaar , net nie baklei nie -dit is nié vinkel en koljander nié.

 

Toe baar sy ‘n blog , die ouvrou met die kamerjas  van die huis op die hoek  met die Sederbome .. wat dankbaar nie gister tydens die woeste storm omgewaai het nie! – en dese Sederbome is nie in doeriejare se Waterkloof nie.

Dit is Vrydag die 24ste Oktober 2014 op my Almanak.